Naay gabiing manglusot
ang mga hinagibang naglupad-lupad
gikan sa pikas kwarto,
tingali nangadagma na sab
ang ilang mga kasing-kasing
ug nagka umod-umod ni
sa lunangan,
Naay gabiing makigduwa
ang mga yawa ug iyang ig-agaw,
sa akong bugnaw nga dunggan,
gikan sa ilang baba, paingun sa
pikas baba, gapanagpa sa ilang kalag
nga gaaliwaros-gapangita
tingali ang kayong ilang giduwaan
gibenditahan maong nangalagpot ang
mga panuway, ug pamalikas
nga namahimong santilmo nga mipainit
sa bugnaw nakong dughan,
Apan inig kabuntag
sa pikas kwarto matingala ka nga
ginasangpit na nila ang langit,
tunga sa lunangan sa ilang dughan,
ibabaw sa mga yawa ug iyang ig-agaw
samtang gasangyaw ang ilang mga kalag,
samtang ako nagpilit sa bugnaw nga
bungbong aron makilimos
sa kung unsa man ang gikibkib nila karon.
No comments:
Post a Comment