Ordir Nambir Eyt

Gadangaw ko ug dupa sa
pagpanukad aron muhalok
sa imo dihang atong nasiplatan
ang usa ka kan-anan;
Su-Tu-Kil inubanan sa
ordir nambir eyt
o nagtikangkang nga baki.

Aron madakpan ang baki
matud ni tatay,
panulo sa basakan inig
humag bundak sa ulan,
hinay-hinayng iitsa ang paon.
ug kung mukubit isulod
dayon sa baskit,
hagki, alam-alami, ayaw buy-i.

Mawa ang kaslayd sa panit
sa pagbudbod og daghang abo,
ug tanggala sama nga
gapanit kag takway,
limpyuhi ang sulod unya
humoli sa ahos, lemonsito, sili
unya ipahapla sa nag-init
nga mantika.

Samtang gahuna-huna ko
sa sitsarong panit sa baki,
miingon ka maypa ang baki lami.



-May 2006-