Aninipot sa akong baba

(alang kang Mamai)

Nagdagan-dagan ang langit ilalom
sa balod paingon sa daplin sa baybay,
ug samtang nagsandig tang duha
sa punuan sa talisay nag-ihap tag
mga bituon nga duol sa bulan.

Sa sige natong pag-uban-uban
nalumsan ang akong dughan
sa imong mga pahiyom ug katahom,
kabalo ba kang
tam-is pa ni sa asukar,
ug lami pa ni sa kondensada,
kabalo ba kang
gusto kong mugunit
sa imong kamot,
muagbay,
mugakos,
muhalok, apan
ako rang gitulon ang akong laway
ug gibalakan ang mga aninipot
nga nag-um-om sa akong baba
dili sila muhawa.

Hapit na maghikog ang mga bituon
sa paghuwat sa akong isulti kanimo,
ug gihawoy naminaw ang dahon
sa talisay sa takla sa imong dila
kalit kang miingon bayot ka?
Ug nanglupad ang mga aninipot
sa akong baba.

- March 2004-