Masamdan ang ginoo sa kahait
sa gibitbit nga pinuti ni Datu
Ang pinuti nga gibaid adlaw-adlaw
maoy nagabarog sa pamaagi
sa hustisya sa mga Ata-Manobo kung asa;
iyang singilon ang nanapaw sa balo,
iyang kabsa’g kinabuhi ang nanguha’g kinabuhi,
iyang kuhaa’g ulo ang makiggubat sa tribu
ug iyang ikulit sa tibuok lawas
ang kaisog sa usa ka manggugubat.
Mao ni timail-han’s dugay nang gituhuan,
Mao ni naghugpong sa tribung namatuto’s
sa yutang tag-iya ang tanan.
Apan miabot ang panahon nga giangkon
nimo ang lapad nilang yuta,
gitituluhan, gipatag, ug imong gipanag-iya.
Nahimo kang agalon sa tag-iya sa pinuti,
ug ikaw nga nagtudlo sa bag-ong kina-adman
gipasilkway mo ang ilang naandan pinaagi
sa paglansang sa imong ginoo.
Sila nga way tinungghaan
Sila nga wa naanad sa bag-ong kalibutan,
ug ikaw nga nagdala sa ngalan sa messiah
nagtuo ka bang mas pinili ka kaysa ila?
No comments:
Post a Comment