Human ko tilawan ang suga sa dakbayan

(after the Davao Bloggers party, I sat in a street bench at
Buhangin waiting for the 2.am trip going to Tagum and was amazed that Davao is very much alive; habal-habal drivers, pimps roaming around, balut vendors,stall owners,teenagers dragging, and with the material i am with, i found myself scribbling these words in a scratch paper )

Ang kalalom sa kagabahiun
maoy misugnod sa imong suga;

misunod ang pagkiay sa mga bulak
aron sila mabaligya,
unya nagpaabot ang mga botelyang
maukban aron lumsan ang mga
basong wa pay kasinatian uban
sa pakighilawas sa nagkalain-laing
hilo sa linghod nilang utok.

Sa pikas nga bahin
nag-ilog ang mga habal-habal
sa mga bituong mangatagak unya,
nga maoy muukab sa kaldero
musindi sa sigarilyo
mukibkib sa binalutan
kay hiyawat na lang matuman
ang sugo sa hait nga init
inig abot sa udtong tutok.

Dihang nakig-ilog na ang
kadlawon sa kagabhiun
nagtungko ko sa lapad nga
nawong sa sementong dalan,
tapad sa mga bulak, botelya,
hilo, ug habal-habal apan
nanggahi kog gipanugnaw taliwala
sa kabibo sa suga sa dakbayan,
ug dihang nahanaw na
ang mga bituon sa pagkanaog sa tun-og
kahibalo kong mupauli nako.

Mupauli ko bisan sa pagpanghurat
sa yutang batuon, o kabagtok
sa kahon sa basakan,
mupauli nako sa lagkaw
kung asa nako gibiyaan
ang way sukod mong pahiyom.


-March 17, 2007-