Lubong sa Itom nga Karnero

Sa adlaw sa imong lamay
madunggan nimo ang mga pagdayeg
sa imong binuhatan, muhilak ang mga
parenting wa nimo nahimamat bisan kanus-a,
manggawas ang mga nindot nga kurtina, suga
ug mga butang nga tinago sauna,
iserbi sa imong mga bisita ang mga pagkaong
tagsa ra imo matilawan ug labaw sa tanan
kumpletong magkatapok ang imong mga igsoo’g
ginikanan aron masud-ong ka nila
sa imong paboritong sanina.


Kanang adlawa ang higayon nga ikaw ma-artista;
istoryahan, tan-awon, pangga-on,
kantahan, koronahan sama nga nagsaulog
sa adlaw’ng natawhan sa imong mga igsoon.


sama sa mga puting rosas, halok, mga katawa, tibi ug
patagaktak sa luha ang imong lubong usa ka
matahom nga pagpakaron-ingnon.



-June 2006-


-archiving mode-